१
काठमाडौं, १७ चैत । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्र, महामन्त्री धवल शमशेर राणालाई पाँच दिन हिरासतमा राखेर अनुसन्धान गर्न अदालतले अनुमति दिएको छ । काठमाडौं जिल्ला अदालतले दई नेतासहित ११ जनालाई पाँच दिन हिरासतमा राखेर अनुसन्धान गर्न अनुमति दिएको हो । तीनकुने घटनामा जोडिएका व्यक्तिहरुलाई न्यायाधीश तारादेवी महर्जनको इजलासले राज्यविरुद्धको कसुरमा अनुसन्धान गर्न ११ जनालाई पाँच दिनको म्याद थप गरेको हो ।
अदालतले आपराधिक उपद्रवसम्बन्धी कसुरमा अन्य ३० जनालाई ५ दिन हिरासतमा राखेर अनुसन्धान गर्न अनुमति दिएको छ । गत शुक्रबार राजावादी समूहले तीनकुनेमा गरेको हिंसात्मक प्रदर्शनमा एक जना पत्रकारसहित २ जनाको ज्यान गएको थियो । उक्त आन्दोलनमा प्रदर्शनकारीहरुले निजी घर, व्यवसायिक भवन, सरकारी भवनलगायतमा तोडफोड, आगजनी र लुटपाटसमेत गरेका थिए ।
